ــــــــــــــــــــــــــــــــــــ

من منية بدواى ... مشوارك
حراسك ... بسمله وتبارك
من جامعة عين شمس فـ ثانيه
لكشوف جامعة بنسلفانيا
واللى انت سنين اتعلمته
للطلبه رجعت وعلمته ...
وعقولهم دارت فى مدارك
....
أول عـ الدفعه سهر وصداع
على ست سنين جندى استطلاع
رمل القنطره يشهد ... ياما شاف
عرقك فى حروب الاستنزاف
لما اخدت بتارنا وتارك
....
فى الغربه عشقت تراب بلدك
ورجعت عشان ولدى وولدك
والسهر اللى فـ ليلك عدى
خلاك للاهوال تتحدى
وتزود قوة إصرارك
.....
وعملت بتخطيط ورويه
ثورة تصحيح اقتصادية
والعملات بعد "الانتربنك"
بقيت الأسعار إياها فشنك
وجنيه مصر اللى انت سفينته
توقيعك زود من قيمته
وده أبسط شىء من أفكارك

ـــــــــــــــــــــــــــــــ
شعر : حسام العقدة

ــــــــــــــــــــــــــــــــ،

* نُشرت هذه القصيدة فى كتاب (نجمان من بلدى) الصادر عن مهرجان الدقهلية الثقافى الثانى والعشرون عام 2007

ـ نُشرت هذه القصيدة فى موقع دنيا الرأى رابط :

http://pulpit.alwatanvoice.com/articles/2011/09/04/236628.html